A alcaldesa da Coruña, Inés Rey, destacou a mobilización de 695 vivendas públicas en dous anos, “que estarán dispoñibles antes de 2028”, froito “do diálogo e a xestión”. “Con política útil, acción directa e horizonte a longo prazo”, recalcou.

Fíxoo nunha rolda de prensa con motivo do cumprimento dos dous anos do segundo mandato da rexedora. Na mesma, asegurou que a cidade herculina “lidera o crecemento en Galicia” e “vive un dos mellores momentos da súa historia recente”, con “unha das menores taxas de paro”, ademais de ser “referente en cuestións como vivenda ou mobilidade sustentable”.

En materia de medioambiente, respecto ao tratamento de lixos, anunciou que “se licitará a nova planta de Nostián este semestre”. Foi tras destacar que durante este mandado pechouse un “conflito histórico” plantando “cara á chantaxe” do anterior comité de empresa da concesionaria de recollida e tamén “está en marcha” a implantación do quinto colector.

“En todos os barrios da Coruña hai proxectos en marcha, espazos renovados e novas oportunidades”, engadiu para incidir entre os logros conseguidos por este goberno no desbloqueo de Coruña Marítima, un proxecto para converter “no mellor espazo urbano de Galicia” terreos portuarios da cidade, tras o traslado de operacións cara ao porto exterior de punta Langosteira, en Arteixo.

Así mesmo, Rey lembrou que ao longo destes dous anos, levaron a pleno 123 asuntos, dos que 119 foron aprobados e 48 tiveron unanimidade. En alusión ao PP, dixo que “o ruído non substitúe ás propostas” e sinalou que expón “esixencias sen solucións porque non existe alternativa a este Goberno”.