O Consello da Xunta autorizou integrar o Centro de Interpretación da Torre de Hércules no Sistema galego de centros museísticos. Segundo destacou a Xunta, este Centro constitúe unha alternativa para todas as persoas que queiran coñecer o interior do monumento e a súa historia.

Inclúe actividades de carácter ambiental, cultural, arqueolóxico e de recreación histórica, que contan coa participación de asociacións culturais e ambientais locais. Tamén se realizan presentacións de diversa índole e visitas específicas de centros educativos.

Agora, coa súa inserción no Sistema galego de centros museísticos permitirase continuar coa súa programación a través do acceso a liñas de axudas públicas, a participación en accións formativas de interese para as súas iniciativas, o acceso a propostas colaborativas ou a actividades itinerantes promovidas pola Administración autonómica.