Son do Nordés comunicou a cancelación do concerto de Diego el Cigala programado para o 20 de xullo na Coruña, no parque de Santa Margarita. Tras unha primeira solicitude desde o BNG e logo a postura na mesma liña desde o goberno local, coa socialista Inés Rey á fronte, a organización asegura que se viu “obrigada” á súa cancelación “debido á prohibición da súa celebración por parte da Concellaría de Cultura”.

“Como consecuencia da recente sentenza condenatoria por malos tratos que enfronta o artista”, sinala en relación ao fallo feito público. Todo o que adquirise as entradas para este evento por Ataquilla.com recibirá a devolución do seu importe e os que o fixeron pola web da organización poderán solicitar o reembolso ou o cambio das entradas para os concertos de Luís Fonsi ou Il Divo. “Lamentamos profundamente todas as molestias causadas por esta situación sobrevinda e agradecemos de antemán a comprensión e a empatía do público asistente”, indica a organización.