Emotiva a entrega do II Premio Tomás Fábregas. O Pazo de Maria Pita acolleu o acto institucional no que se recoñeceu o traballo da entidade ALAS A Coruña, referente do activismo LGTBI na cidade e símbolo da defensa dos dereitos humanos, a igualdade e a xustiza social.
A rexedora Inés Rey puxo en valor o compromiso de ALAS e alertou dos riscos que supón o avance da ultradereita para os dereitos fundamentais: “Fronte ao odio disfrazado de opinión ou de falsa neutralidade, nesta cidade non imos retroceder”, afirmou.
A xornada serviu para lembrar a figura de Tomás Fábregas, activista coruñés que en 1992 desafiou a prohibición de entrada nos Estados Unidos ás persoas con VIH, converténdose nun símbolo internacional da loita contra o estigma: “Este premio non é só un recoñecemento. É un recordatorio de que os dereitos se defenden cada día. A dignidade humana non é negociable”, sinalou Rey.
A concelleira de Benestar Social, Participación e Igualdade, Nereida Canosa, puxo en valor os 15 anos de traxectoria de ALAS A Coruña, lembrando a súa orixe no legado do colectivo Milhomes e a súa acción continua nos ámbitos da saúde, educación, cultura, mocidade, apoio legal, asesoramento psicosocial e denuncia das violencias LGTBIfóbicas.
Este é un ano moi especial para a entidade, pois vén de recoller varios recoñecementos.
Máis novas
A asociación LGTBI+ Alas Coruña recibiu o premio Pedro Zerolo
O Corufest 2025 entrega o recoñecemento Samuel Luiz ao colectivo LGTBIQ+ Alas Coruña
