Volve solicitar a plataforma Defensa do Común o acceso ao expediente da licenza outorgada o pasado 4 de xuño á promotora vasca Lipromo para edificar un bloque de 56 vivendas na parcela 2 do polígono do Campo da Estrada-Maestranza.
A este respecto, a entidade lembra que xa solicitara a mesma petición o pasado 11 de xuño, sen obter resposta algunha por parte do goberno local, comportamento que tilda de “hermético e lamentábel por negar o acceso a unha información que resulta fundamental coñecer, xa que dita licenza foi concedida ao amparo dun Estudo de Detalle que, na actualidade, está en trámite de conclusións nun proceso xudicial trala impugnación do mesmo por parte de Defensa do Común no TSXG”. Esta plataforma cívica advirte dos “enormes perxuizos que unha hipotética anulación do Estudo de Detalle conlevaría para o Concello xa que quedaría sen a preceptiva cobertura xurídica”.
En apoio da súa petición, Defensa do Común “apela tanto ao dereito á acción pública urbanística como ao acceso á información, aspectos que resultan de obrigado cumprimento por parte dos gobernos locais, ao tempo que anuncia que exercerá todas as accións administrativas e xudiciais que correspondan para a anulación definitiva da licenza en cuestión”.
Máis novas do proceso
O TSXG admite a trámite un recurso contra a urbanización do Campo da Estrada-A Maestranza
As 10 promocións urbanísticas formuladas na Coruña prevén a construción de 18.000 novas vivendas
