A alcaldesa da cidade herculina, Inés Rey, esixiu á Xunta e ao seu presidente, Alfonso Rueda, non “romper” o acordo sobre a docencia de Medicina no Complexo hospitalario universitario da Coruña (Chuac).
Fíxoo tras o anuncio de que o Servizo Galego de Saúde (Sergas) vai adscribir a formación do Grao en Medicina en todos os hospitais de Galicia á Universidade de Santiago de Compostela (USC).
“A miña rotunda oposición a esta medida, isto non é descentralizar é recentralizar”, manifestou respecto dun convenio que de aprobarse, segundo explicou, “vai contra os profesionais sanitarios da Coruña, contra os docentes, contra o Instituto de Investigación Biomédica da Coruña (INIBIC) e, en definitiva, contra a cidade”.
A rexedora instou ao presidente da Xunta a que “non dea un paso que supón romper cun acordo que funcionou durante 25 anos” para engadir que “xa non é que non se lle dea á cidade a titulación que reclama e que merece senón que se produciría un retroceso sen precendentes no alcanzado ata agora”. “Supón eliminar de facto toda posibilidade de que exista unha facultade de Medicina na Coruña”, incidiu.
“Esixo que rectifique de inmediato, que non rompa cun consenso que respondía á realidade da comunidade e que dea marcha atrás nesta recentralización totalmente arcaica”, reiterou. Reclamou, á súa vez, que “apoie o tecido universitario sanitario e social da Coruña”.
