Varios colectivos, entre eles o colectivo BDS Galiza, sumáronse á convocatoria cidadá de concentración neste venres 25 de xullo ás 20:00 h na praza de Ourense, a carón do acceso ao festival Morriña Fest, para denunciar a negativa da promotora Bring the Noise a responder ás demandas éticas da sociedade civil palestina.
Esta protesta marcou o inicio dunha nova fase da campaña contra os festivais ligados ao fondo de investimento KKR, propietario último do Morriña Fest a través de Superstruct. A cidadanía comprometida busca “visibilizar a complicidade indirecta do festival co apartheid israelí e reclamar que as entidades culturais con financiamento internacional asuman criterios éticos básicos”.

Nas últimas semanas, BDS Galiza tentou contactar sen éxito coa organización do Morriña Fest para propoñer unha reunión e presentar os catro mínimos éticos impulsados pola maior coalición palestina, liderada polo Comité Nacional Palestino de BDS e a Campaña para o Boicote Académico e Cultural a Israel (PACBI). Bring the Noise non respondeu a ningunha das comunicacións enviadas.

Este silencio resulta especialmente grave no actual contexto de xenocidio en Palestina, recoñecido por múltiples expertos da ONU e advertido polo Tribunal Internacional de Xustiza. Mentres tanto, cada vez máis artistas e festivais se posicionan: Residente cancelou as súas actuacións no FIB e no Morriña Fest precisamente pola súa vinculación con KKR, fondo directamente relacionado con empresas cómplices de crimes de guerra israelís. Tamén outras bandas como Califato 3/4, La Élite, Judeline ou Samantha Hudson retiráronse doutras edicións de festivais vinculados ao mesmo fondo.

Diante da pasividade do Morriña Fest, BDS Galiza chama á mobilización e á solidariedade da cidadanía galega.