O conselleiro de Sanidade, Antonio Gómez Caamaño, insistiu en que tanto a Universidade da Coruña (UDC) como a de Vigo (UVigo) tamén poderán adscribir hospitais “de toda Galicia” ás súas titulacións, igual que a Universidade de Santiago (USC). Isto “verase” nos textos finais dos concertos para a formación sanitaria que cada universidade firme coa Xunta, aínda que as tres están aínda “en trámite” por parte da Consellería e das propias institucións académicas.

A preguntas dos medios este martes, tras un acto en Santiago, Gómez Caamaño non ofreceu unha data para elevar estes acordos ao Consello da Xunta porque aínda “se está traballando” nos textos. A USC aprobou a semana pasada o seu en consello de goberno. O conselleiro si recalcou que os respectivos concertos establecerán “dereitos exactamente iguais para as tres” universidades, a pesar das queixas da UDC sobre a adscrición do Complexo Hospitalario da Coruña (Chuac), igual que o resto de centros do Sergas, ao Grao en Medicina pola USC. De tal modo, Gómez Caamaño insistiu en que, “se a Universidade de Santiago pode adscribir centros de toda Galicia”, tamén as outras dúas poderán facelo para as súas titulacións sanitarias.

A UDC REXEITA ADSCRIBIR TODOS OS HOSPITAIS AO GRAO DE MEDICINA DA USC

Así as cousas, o reitor da Universidade da Coruña (UDC), Ricardo Cao, rexeitou o concerto que permitirá adscribir todos os centros do Servizo Galego de Saúde (Sergas) ao Grao en Medicina da Universidade de Santiago de Compostela (USC). “Crear unha situación hexemónica na que desde a USC teña control absoluto sobre a vinculación dos hospitais a efectos de Medicina é un cambio total e absoluto das regras do xogo”, contestou a preguntas dos medios sobre este asunto nun acto na Coruña.

Cao lembrou que “o Chuac — Complexo hospitalario universitario da Coruña — está vinculado única e exclusivamente á UDC” e engadiu que sucede “o mesmo” no resto de hospitais galegos coas súas “universidades de referencia”. “Isto estase pretendendo cambiar e esa pretensión de cambio obviamente afecta claramente as regras do xogo”, insistiu. “Por suposto que nós seguimos firmemente convencidos da nosa aposta por implantar a titulación de Medicina na UDC“, recalcou para apuntar que o farán “dialogando e escoitando pero facendo algo que sexa útil non facendo un paripé”.

RUEDA REITERA A VONTADE DA XUNTA DE AVANZAR NA “DESCENTRALIZACIÓN”

Pola súa banda, o presidente da Xunta, Alfonso Rueda, reiterou este martes a vontade do seu Goberno de avanzar en “descentralizar” o Grao en Medicina pola Universidade de Santiago de Compostela (USC) para que cada vez se imparta máis docencia fóra da capital. Así respondeu ao ser preguntado polos medios na Coruña sobre unha información publicada este martes en ‘Faro de Vigo’, acerca de que xefes de servizo do Complexo Hospitalario Universitario de Vigo reclaman poder impartir o segundo ciclo de Medicina da USC ou, se non, impulsarán unha reclamación da titulación para a cidade olívica igual que xa fixo a Universidade da Coruña (UDC).

Alfonso Rueda entende que a postura dos facultativos vigueses “vai nesa liña” de “descentralizar” o grao xa existente, tal e como se acordou en 2015 e no que está centrado o grupo de traballo conformado por representantes do Goberno galego e do tres universidades públicas, que este xoves manterá unha nova reunión. “E eu espero que teña resultados”, agregou o presidente da Xunta. Rueda recoñeceu que o acordo de 2015, que pemitiu levar a docencia clínica de 6º curso de Medicina fóra de Santiago, “non se estaba desenvolvendo na súa totalidade” e que “había moito que mellorar”.

CONCERTOS UNIVERISDADES-SERGAS

Pero no medio desta polémica xurdiu un novo conflito en días pasados, despois de transcender que a USC adscribirá todos os centros do Servizo Galego de Saúde (Sergas), incluídos os de Vigo e A Coruña, á súa Facultade de Medicina por ser a única que hai en Galicia. O luns, o presidente da Xunta defendía o convenio con USC porque iso “non significa dar nada nin exclusividade de nada”, xa que as outras dúas universidades poderían facer o mesmo coas instalacións do Sergas. Precisamente, nesta mesma idea incidiu este martes o conselleiro de Sanidade, Antonio Gómez Caamaño.