A Coruña acollerá do 4 de setembro ao 18 de outubro a IV edición do ciclo de concertos ‘Noites na Cidade Vella’, que ofrecerá once concertos gratuítos en edificios históricos e museos emblemáticos da cidade, con entrada libre ata completar a capacidade. Así se informou na presentación, nun acto presidido polo concelleiro de Cultura e Turismo, Gonzalo Castro. O evento está organizado pola Fundación Rogelio Groba, en colaboración co Concello da Coruña e da Deputación coruñesa.

O programa reunirá a intérpretes nacionais e internacionais como o violonchelista Santiago Cañón-Valencia ou o violinista Kevin Zhu, o guitarrista Marcos Díaz, Quartet Hana, o Dúo Mandala e a pianista Marianna Prjevalskaya, entre outros. Noutra orde de cousas, oito festivais da provincia contarán con puntos LGTBI+ ao amparo da campaña Liberdade de Ser e de Sentir. Instalaraos a asociación Alas A Coruña para “sensiblizar, informar e achegar recursos á cidadanía sobre a diversidade afectiva, sexual, de xénero e familiar”, informa a institución provincial.