A alcaldesa da Coruña, Inés Rey, e a presidenta da Federación Provincial de ANPAs de centros públicos, Lida María Paz Lamela, asinaron este luns o convenio de colaboración para apoiar a realización de actividades educativas, culturais e deportivas durante este ano.

O acordo, cunha achega municipal de 425.000 euros con cargo ao orzamento de 2025, permitirá financiar iniciativas dirixidas ao alumnado, tanto no ámbito escolar como fóra del, que se desenvolverán entre o 1 de xaneiro e o 31 de decembro.

A alcaldesa subliñou que “o ensino público é un alicerce esencial para a igualdade de oportunidades” e engadiu que este convenio “reforza o traballo que as ANPAs realizan en beneficio da comunidade educativa”.

A Federación Provincial de ANPAs, entidade sen ánimo de lucro que agrupa a asociacións de nais e pais de toda a cidade, promove cada ano talleres, excursións, campamentos, actividades deportivas, culturais e proxectos de protección da infancia, da natureza e do medio ambiente.