Xa protestaran en marzo, pero visto que o proxecto non cambiou, a Asociación Galega de Profesionais da Xestión Cultural (AGPXC), lanza a grave denuncia pública.
A entidade, que representa a máis de 160 profesionais do sector en Galicia, lanza “un novo e urxente chamamento público diante do silencio institucional do Concello da Coruña e dos arquitectos responsables da reforma dos Cantóns, José Manuel Vázquez e Carmen Calatayud”.
Denuncian que “a proposta de trasladar a parada dos autobuses metropolitanos á rúa Manuel Casas —lateral do Teatro Colón— provocará un colapso funcional e un risco evidente para a seguridade de persoas usuarias, traballadoras e compañías culturais, ao converter o único acceso técnico do teatro nun espazo compartido con centos de persoas e vehículos pesados cada día”.
Esta situación provocará que “o Teatro Colón, espazo emblemático da Rede Española de Teatros e Auditorios, con décadas de historia e relevancia estatal, podería verse rebaixado á categoría de espazo inoperativo. Esta reforma compromete o seu futuro e danará irreversiblemente o prestixio da cidade como destino cultural”.
“Ignorancia ou desprezo institucional?”
Desde marzo deste ano, a AGPXC presentou alegacións formais, avaladas polo Grupo Municipal do BNG e por responsables da área de Cultura da Deputación da Coruña, entidade titular do Teatro Colón. A resposta foi o máis absoluto silencio por parte da Concellaría de Infraestruturas e Mobilidade e do equipo redactor da reforma.
Nun acto público celebrado o 3 de abril, un membro da directiva de AGPXC trasladou persoalmente aos arquitectos a gravidade da situación e entregou o seu contacto directo para estudar alternativas. “Prometeron unha xuntanza que nunca se convocou, malia as
chamadas posteriores ao seu despacho profesional”, sinalan dende a AGPXC.
Consecuencias “inmediatas e irreversibles”
A entidade enumera as consecuencias
● Redución a mínimos da operatividade do teatro: a zona de carga e descarga
quedará limitada a un espazo mínimo, inutilizable para espectáculos de mediana ou
grande complexidade.
● Encarecemento das producións: os custos de carga/descarga multiplicaranse por
dous ou tres debido ao tempo e á dificultade operativa. Estímase unha suba media
do prezo das entradas do 10 ao 15%.
● Fuga de programación: compañías escénicas e musicais escollerán auditorios de
Ferrol, Narón ou espazos privados como Palexco, que aínda que teñen alugueiros
elevados, ofrecen operatividade loxística.
● Risco laboral e de accidentes: a presenza de vehículos pesados, operacións
nocturnas, cargas delicadas e multitudes na zona crea unha situación incompatible
coas normativas de seguridade e prevención de riscos laborais.
Ante todo isto, solicitan “a paralización inmediata das obras na rúa Manuel Casas, mentres se avalían alternativas viables para a parada dos autobuses metropolitanos”; “a convocatoria urxente dunha xuntanza entre responsables municipais, os arquitectos do proxecto e profesionais dos teatros afectados”; e “a implicación directa da Alcaldesa Inés Rey, como máxima responsable institucional, para garantir que esta reforma non converta un espazo público cultural nun punto morto da programación escénica galega”.
