Despois da concentración deste pasado sábado en apoio á Global Movement to Gaza no Obelisco, o domingo partía xa de Barcelona, a Flotilla Sumud Global camiño de territorio palestino. E a bordo está a avogada Sandra Garrido Fernández, directora de asuntos internacionais da Fundación Terrum / Asensi Contrario e especialista en situacions de crisis.

A Flotilla Sumud GLobal, unha flota coordinada e non violenta, que conta coa participación de delegacións de 44 paises na súa misión de romper o asedio ilegal de Israel a Gaza e abrir un corredor humanitario. A emerxencia está en “romper o bloqueo imposto polo Estado de Israel a Gaza”.

Aí estará Sandra Garrido, unha muller que leva máis de 30 anos vinculada ao activismo social no noso país e noutros puntos do Estado, cunha traxectoria ampla en movementos feministas, de solidariedade internacional e de defensa dos dereitos humanos. Foi socia fundadora da Coordinadora Nacional Galega da Marcha Mundial das Mulleres e participa en grupos feministas autónomos desde hai máis de tres décadas. Ademais, é colaboradora en plataformas como Galiza por Palestina, Compostela por Palestina e Pallasos en Rebeldía, así como na Fundación Terrum, dedicada á defensa dos dereitos humanos, do medio ambiente e da memoria histórica.
Dentro da súa experiencia laboral, mencionar que forma parte do Grupo de Intervención Xurídica Socio-Comunitaria (GIX) e doutros colectivos galegos e estatais relacionados coa xustiza social, a diversidade funcional, o movemento LGTBIQ ou a defensa dos dereitos das persoas presas.