Ademais do Flores Rock, San Vicente de Elviña vivirá esta fin de semana as súas festas de barrio, cunha ampla programación de actividades para todos os públicos que se desenvolverán entre o sábado 6 e o domingo 7, organizadas pola asociación veciñal Os Rexumeiros coa colaboración do Concello.
A primeira xornada arrincará coa realización dun mercado ecolóxico que terá lugar na rúa Rebandas das 9.00 ás 15.00 horas. Entre medias, haberá un pasarrúas a cargo da agrupación folclórica Aturuxo e xa ás 14.00 horas terá lugar a lectura do pregón con Ignacio Bermúdez e Os do Furancho de Elviña. Pola tarde, estarán Pulpiño Viascón, haberá inchables para as e os máis pequenos e xa pola noite volverá a música con DJ Takesound e o prato forte do día, a actuación da orquestra Los Platinos, ás 22.00 horas.
O domingo 7, ás 12.00 horas, o ritmo de inicio marcarao a Banda Municipal, que actuará antes da sesión vermú. Xa pola tarde, festa da espuma a partir das 17.00 horas e, ao final da xornada, ás 20.00 horas, a actuación de José Brea.
A Falperra, próxima parada das festas nos barrios
As festas nos barrios da Coruña arrincaron o pasado mes de maio, cun calendario de 21 citas en total entre os diversos distritos da cidade.
Ademais, das 16 festas dos Barrios que se artellan este ano, aínda quedan as da Falperra (13-14 de setembro), Monte Alto (20 de setembro), Cidade Vella (3-4-5 de outubro) e O Ventorrillo (9-10-11-12 de outubro).
Bandas históricas do pun estatal comparten protagonismo coas bandas locais no Flores Rock
