Os traballadores e traballadoras de Vegalsa-Eroski acodiron á última das mobilizacións iniciadas o pasado 11 de xullo convocadas pola CIG.

A protesta comezou diante do Eroski Center de Vioño e dende alí as traballadoras e traballadores saíron en marcha até a sede de Vegalsa no Polígono da Agrela onde fixeron entrega dos centos de sinaturas recollidas entre o cadro de persoal reclamándolle á empresa solucións urxentes.

As seccións sindicais da CIG acordaron desenvolver mobilizacións nas catro provincias ante a falta de actuacións da empresa para reverter a sobrecarga de traballo que ten que soportar o persoal a causa da política de cero substitucións. “Levamos anos demando que se contrate máis persoal e se fagan formacións pero a empresa, a pesar dos millonarios beneficios que ten, mira para outro lado e non toma ningunha medida”, critica Alejandra Formoso, delegada da CIG en Vegalsa-Eroski.

Esta esforzo continuado para poder sacar adiante a excesiva carga de traballo ten consecuencias directas sobre a saúde física e mental das traballadoras e dos traballadores “e estamos en máximos históricos de absentismo”, cun elevado número de baixas por problemas músculo-esqueléticos. “Por enriba, as mutuas non queren recoñecelas como enfermidade profesional, cando na realidade desenvolvemos un traballo moi duro e a un ritmo moi alto durante toda a nosa xornada laboral, facendo grades esforzos físicos e cargando pesos, ás veces durante nove horas”.

Xunto a isto, a representación da CIG denuncia os elevamos índices de parcialidade na contratación e as ampliacións horarias neste tipo de contratos “ao antollo da empresa, impedindo así que estas compañeiras poidan coller outro traballo que lles permita chegar a fin de mes”.