O Concello de Culleredo vén de recibir unha importante axuda para desenvolver un proxecto de infraestrutura verde dentro do plan europeo anunciado polo Ministerio de Facenda. Do investimento total de 10,9 millóns, financiado nun 60% pola UE, o goberno municipal dedicará 4,7 millóns á conectividade ambiental, sendo a liña con maior reserva orzamentaria.

A EDIL (Estratexia de Desenvolvemento Integrado Local) recolle a redacción dun plan local de infraestrutura verde, un documento que integrará todas as políticas ambientais do municipio. Nel, o Concello determinará as accións para adoptar, con especial énfase no papel dos corredores ambientais como elementos de articulación territorial.

“O desenvolvemento de Culleredo vai da man do incremento dous espazos verdes”, destaca o alcalde, José Ramón Rioboo. O rexedor sinala que todas as actuacións de mellora urbana que está a executar o Concello contemplan sempre a integración de árbores e plantacións como acenos de identidade.

Así, o Concello, dentro do plan, implantará tres grandes conectores. Serán espazos onde predominará o verde, os elementos sostibles e a protección á biodiversidade. Funcionarán como itinerario entre os núcleos residenciais da contorna da ría e o propio litoral, ámbito principal desta EDIL.

Neste sentido defínense tres conectores: no Burgo, Acea de Ama, e Fonteculler.

• No Burgo enlazará a praza de Galicia coa ría xunto á Cros, servindo como ligazón ao mar xunto ás estruturas da antiga fábrica.
• En Acea de Ama o conector terá un compoñente eminentemente ambiental co río Trabe como eixo, chegando desde a avenida de Ribados ata o xardín botánico.
• E en Fonteculler se aposta por un conector dotacional, enlazando os equipamentos como o CEIP Ría do Burgo, o IES Blanco Amor, a Universidade Laboral, a Policía Local e Garda Civil coa lagoa de Fonteculler.

En todos os corredores impulsaranse refuxios climáticos, incrementarase a dotación de espazos verdes e dispoñeranse elementos que melloren o confort para o veciño.

O Concello, ademais, emprenderá unha renovación do Xardín Botánico do Burgo, un dos corazóns verdes do municipio. As medidas previstas buscarán o incremento do equipamento da aula de Natureza, situada dentro do recinto, a posta en valor dos xardíns e o desenvolvemento de novos programas para o visitante.

6,5 millóns de axuda

O Ministerio de Facenda publicou onte a resolución provisional da convocatoria de fondos europeos, sendo o Concello de Culleredo beneficiario dunha contía de 6.547.728 euros, un 60% do investimento total, que será de 10.912.880 euros.