Debullábamos onte como vai ser o proxecto urbanístico na “API Q28 Parque de Oza”, que suporá a construción de 6 grandes mazás, con máis de 20 edificios de ata 17 alturas entre o Parque de Oza e o complexo deportivo do Castrillón.
Un pouco máis cara o noroeste, cara os castros, atópase unha zona abandonada dende hai décadas, na confluencia das rúas Cerca e Antonio Ríos. Pero parece que a zona vai ser rehabilitada en breve, como confirma a Xunta Directiva da Asociación Urbanística Castrillón-Soto (IAR), que vén de expresar a súa satisfacción polo feito de que finalmente se poña en marcha o Proxecto de Urbanización da API R28.2 (POL H9.06).
A urbanización implicará unha ordenación das vías adaptadas ás necesidades do tráfico, a ampliación de beirarrúas e creación dunha pequena praza para que os residentes poidan relaxarse e desfrutar, equipada con mobiliario urbano axeitado. Tamén se mellorará a circulación peonil coa creación de novos pasos de peóns.
Ademais, unha vez rematada a urbanización da urbanización, os promotores poderán proceder coa construción dos edificios, de acordo coas súas obrigas como membros da xunta de compensación urbanística.
Longo camiño
A entidade explica o procedemento: “Tivemos que percorrer un longo camiño para chegar ata aquí. O POL H9.06 era un polígono industrial xestionado por “compensación” e, como non se estaba a urbanizar, acordouse pasalo a xestión en “cooperación”. O cambio significou que a iniciativa deixou de ser privada e pasaría a ser municipal, aínda que o custo da urbanización seguía sendo o mesmo, asumido polos propietarios, un dos cales era o propio concello”.
”O proceso atrasouse moito porque algúns dos propietarios tardaron máis dun ano en achegar as súas cantidades correspondentes aos custos de urbanización. Unha vez elaborado o orzamento hai máis dun ano, o proxecto saíu a licitación por 206.739,68 € + IVE e un prazo de execución de seis meses”. O proxecto foi finalmente adxudicado a Jardinerías ARCE S.L. cun custo de 199.503,78 € + IVE”.
Máis novas do Castrillón
A veciñanza do Castrillón coñece o proxecto da urbanización das 1.000 novas vivendas
