A remodelación dos Cantóns, na Coruña, iniciará unha nova fase de obras a partir do próximo luns, día 13, con actuacións entre a rúa Santa Catalina e o Cantón Grande. Por iso, as paradas de transporte urbano, taxis e BiciCoruña, así como a zona de carga e descarga de mercadorías trasladaranse ao Cantón Pequeno.

Segundo informa o Concello da cidade herculina, serán tamén visibles as primeiras intervencións na contorna do Obelisco.

Ademais, nesta etapa pecharase “definitivamente” ao tráfico o acceso aos Cantóns desde Durán Loriga por Santa Catalina. “Este treito pasará a ser totalmente peonil, para darlle continuidade a un percorrido natural desde a praza de Mina ata a rúa Real”, apunta o consistorio.

Non osbtante, a circulación do tráfico polos Cantóns seguirá estando habilitada, xa que as obras non afectarán os carrís da calzada, engade.