O complexo hospitalario universitario da Coruña (Chuac) dispón de dispositivos antierrores para evitar confusións no momento de administrar fármacos. Na actualidade, utilízanse para anestesíaa epidural nos partos pero a previsión é implantalo “en todo o complexo, aos poucos”.
“Levamos desde antes do verán rodando, pódese usar para todo tipo de analgesia que non sexa intravenosa”, explicou a xefa do Servizo de Anestesia e Reanimación do Chuac, Felisa Álvarez, en declaracións a Europa Press.
Fíxoo tras recalcar que “este novo mecanismo, que non é alta tecnoloxía, produce unha gran seguridade porque é imposible equivocarse”. Apunta que “é unha conexión diferente” xa que os catéteres, xiringas e vías non encaixan fisicamente e fai incompatible o cruzamento de fármacos.
“Cando estamos a administrar medicamentos pode haber algún erro na vía e calquera modificación que aumente a seguridade dos pacientes nun ambiente hostil como pode ser un quirófano sempre é estupendo”, insistiu.
Na Coruña, comezaron a usalo en obstetricia por ser un departamento “especialmente sensible” e os facultativos móstranse “encantados”. “Os erros son pequenos e moi poucos, pero os de medicación son uns dos máis frecuentes e evitables”, sinalou Álvarez. “Pór unha mediación que non é específica para esa vía pode producir complicacións graves”, alertou.
O Chuac é o primeiro centro galego en utilizar estes dispositivos antierrores denominados NRfit que xa están operativos en “un dez hospitais” de España, engadiu. “Está a implantarse en Europa tamén e en Inglaterra xa é obrigatorio este sistema”, concretou a doutora.
MATERIAL PEDIÁTRICO
Por outra banda, a Consellería de Sanidade publicou no Portal de Contratos Públicos a licitación, por importe de 37.500 euros, da subministración dun respirador con ventilación mecánica invasiva e non invasiva para uso pediátrico e neonatal na Unidade de Coidados Intensivos Pediátricos do Chuac.
Segundo traslada o Executivo galego, as empresas interesadas teñen de prazo ata o 5 de novembro para presentar as súas ofertas para esta ferramenta terapéutica “esencial” no manexo do paciente crítico, xa que o seu emprego permite “garantir un adecuado intercambio gaseoso” en persoas con insuficiencia respiratoria aguda ou crónica.
Ademais, a Unidade de Queimados do Chuac foi acreditada pola Asociación Europea de Queimados (EBA) como centro de referencia europeo.
Segundo informa o Servizo Galego de Saúde (Sergas) trátase dunha certificación que “garante o cumprimento dos máis altos estándares de atención, docencia e práctica médica no campo deste tipo de lesións”. Coa obtención desta acreditación, engade, convértese na segunda unidade de queimados dun centro español que a consegue despues do Hospital Universitario Vall d’Hebrón.
