InicioCULTURAO FIGA fará unha chamada á diversidade e á inclusión no sector...

O FIGA fará unha chamada á diversidade e á inclusión no sector audiovisual

Publicada o

Por Ubaldo Cerqueiro

Despois do primeiro avance lanzado a semana pasada, esta mañá de xoves 30 de outubro tivo lugar a presentación do III Foro da Industria Galega do Audiovisual (FIGA). Unha cita que converterá a próxima semana a cidade da Coruña no epicentro da reflexión sobre a diversidade e a inclusión no audiovisual.

Organizado pola Academia Galega do Audiovisual, co apoio do Concello da Coruña e da Deputación da Coruña, o encontro celebrarase do 5 ao 7 de novembro no Espacio Avenida e nos Cantones Cines, e reunirá durante tres días a creadoras, profesionais e especialistas galegos e estatais para abordar os desafíos e oportunidades dun audiovisual máis plural.

A vicepresidenta da Academia Galega do Audiovisual, Carmen Méndez, destacou que “FIGA naceu como un espazo de diálogo e crecemento colectivo, e nesta terceira edición consolídase como un foro imprescindible para pensar un audiovisual galego máis plural, accesible e comprometido coa realidade diversa da nosa sociedade”.

O programa de FIGA

A programación desta edición, comisariada pola xestora cultural Salima Jirari, especialista en diversidade, igualdade e inclusión, combina proxeccións, charlas e mesas redondas que percorren diferentes dimensións da representación e da pluralidade no audiovisual contemporáneo.

O foro abrirase cun estudo de caso do Festival Norte Cinema Diverso, da man de Fito Ferreiro e Alfonso Hermida, e continuará coa proxección dunha selección de curtametraxes do certame —An avocado pit, de Ary Zara; O coidado, de Miguel Canalejo; e Ese lugar partido, de Pablo Santidrián e Inés Pintor—, presentadas polos seus autores. A inauguración culminará coa performance Flúor significa escuridade, da creadora e performer Nuria Vil, unha peza que combina poesía, corpo e música electrónica e que explora as emocións colectivas desde unha linguaxe poética e visual.

O segundo día abrirá con Radiografía: representación e diversidade en cifras, unha charla a cargo de Salva Tabone, coordinador de investigación do Observatorio para a Diversidade no Audiovisual, que achegará datos e análises sobre a realidade da representación nos medios. Seguiralle a conversa Recursos para imaxinar unha industria máis plural, con Mel Estaba, Gema Arquero, Nati Juncal e Bárbara Tardón, catro profesionais que abordarán ferramentas prácticas e experiencias transformadoras dende o feminismo e as narrativas queer.

A continuación, a mesa Describindo a norma, moderada por Anxos Fazáns, reunirá a Ian de la Rosa, Lucía Estévez, Javi Ferreiro e Eva Libertad para analizar como o cinema pode cuestionar os marcos tradicionais de representación. Pola tarde, Novas perspectivas na produción, moderada por Silvia Fuentes, contará con Gema Arquero, Charli Bujosa, Bea Saiáns e Nati Juncal, centrando o debate na produción audiovisual como espazo de diversidade e transformación.

A xornada rematará coa proxección de Sorda, filme dirixido por Eva Libertad e preseleccionado pola Academia de Cine para representar a España nos Premios Oscar, seguida dun coloquio coa directora, moderado por Salima Jirari.

O venres, FIGA poñerá o foco nos novos roles emerxentes dentro do sector, con voces como Lola Clavo, Pablo Romero e Salima Jirari, moderadas por Fon Cortizo, nun diálogo sobre a importancia da coordinación de intimidade e da accesibilidade nas producións.

De seguido, a mesa O persoal é cinematográfico, con Alejandro Marín, Afioco Gnecco, Jiajie Yu Yan e Xiana do Teixeiro, moderada por Ángel Filgueira, explorará a relación entre identidade, memoria e creación audiovisual.

Xa pola tarde, O casting como oportunidade para ampliar imaxinarios, moderada por Saamira Ganay, reunirá a Kathy Sey, Camila Bossa, Laura Galán e Miriam Garlo, nun diálogo sobre a representación diversa e o impacto das eleccións de elenco na construción de novos relatos.

O foro pechará coa proxección de La Furia, filme protagonizado por Ángela Cervantes e Àlex Monner, un drama sobre o trauma e a creación escénica, acompañado dun coloquio coa produtora Mireia Graell, moderado pola escritora Andrea Nunes.

Inscrición e acceso

As entradas teñen un custo simbólico de 5 euros por día en concepto de reserva de praza, devoltos integramente ás persoas asistentes. O formulario de inscrición está dispoñible na web da Academia Galega do Audiovisual.

 

Máis info

O FIGA afondará na Coruña sobre a diversidade do audiovisual galego

ÚLTIMAS

Buscan o autor do atropelo que acabou coa vida dun mozo de 25 anos

Un mozo de 25 anos morreu como consecuencia dun grave atropelo na Coruña. Segundo...

As razóns dos traballadores da Compañía de Travías para a folga deste luns 16N

Este luns 16 de novembro, teñan coidado se pensan ir en bus ao posto...

O Concello da Coruña centra a súa campaña do 25N na violencia dixital e vicaria

O Concello da Coruña desenvolverá ata o 3 de decembro unha campaña con motivo...

Corte na AC-214 a partir deste luns por obras na ponte sobre o río Mero, en Cambre

O tráfico estará cortado a partir deste luns, 16 de novembro, polas obras da...

DEIXAR UN COMENTARIO

Please enter your comment!
Please enter your name here