Este xoves 6 de novembro volve haber pleno en María Pita, e os asuntos laborais terán protagonismo, unha vez que o PP vai pedir novas axudas para os autónomos, mentres que o BNG pregunta pola Relación de Postos de Traballo.

A RPT

Parao BNG, “a Relación de Postos de Traballo do Concello da Coruña está moi desfasada, o que impide que se realice unha xestión eficiente do seu cadro de persoal”. Así entende o grupo da oposición este fundamental documento que regula as relacións laborais do Concello cos seus traballadores municipais.

“É necesaria unha redacción nova, calquera traballadora ou traballador do Concello concorda niso. A actual RPT é ineficiente e causa prexuízos non só á Administración municipal, mais tamén á veciñanza”, afirma David Soto, que vai levar unha moción sobre o asunto ao Pleno do vindeiro xoves. “É hora de aprobar unha nova RPT. Vímolo demandando desde hai moito tempo”, destaca.

O grupo critica ademais que o Goberno Local introduza “modificacións puntuais”, que considera “remendos”, por exemplo “coas prazas da Administración especial, aquelas que xestionan ámbitos especializados dentro da función pública, se vai esixir unha titulación específica”. Lamenta que “o proceso non foi debidamente negociado cos sindicatos” e sen que fique claro “o criterio que se segue para o esixir nunhas prazas si e noutras, non”.

Axudas para os autónomos

Pola súa parte, o Grupo Popular rexistrou unha moción para o seu debate e aprobación con medidas de apoio aos traballadores autónomos da nosa cidade. “O Goberno Municipal ten que deixar de ser un obstáculo para quen xerar emprego e riqueza na Coruña, con subidas de impostos como a taxa de lixo un 43% ou duplicando a de terrazas no caso da hostalería. Deben levar a cabo medidas efectivas que escoiten ao autónomo e permítanlle crecer. Non pode seguir actuando como mero recadador de licenzas e taxas”, sinala Miguel Lorenzo.

Por iso, o PP solicita nesta moción:

• ”Revisar taxas e tributos municipais que afecten directamente a este colectivo coa finalidade de establecer bonificacións ou exencións para novos emprendedores ou negocios que estean a atravesar dificultades”.
• ”Reducir a burocracia mediante simplificación de licenzas e outros trámites”.
• ”Constituír unha Mesa Municipal do Autónomo na que estean representados xunto con representantes doutras entidades empresariais e grupos políticos para poder avaliar a situación do sector e propoñer melloras”.
• ”Cumprir os prazos legais nos pagos aos provedores xa que así se garante que os autónomos que traballan para o Concello van cobrar en tempo e forma. (PMP, a agosto de 2025, é de 50,08 días)”.