Acollía esta pasada noite de venres a pista cuberta da Normal a celebración do Magosto da AVV de Labañou, San Roque, Zona Escolar e Os Rosales. As castañas (baratas aquí), o chocolate e as chapas feitas pola rapazada daban a benvida a unha cita interxeracional.
A xornada comezaba con talleres de cabazas e unha procesión de Samaín para as crianzas.
Xa ás 21:00h, e mentres entraba a divertida e reivindicativa comitiva da Masa Crítica, saían ao escenario os Festicultores, o pasarúas máis divertido de Galicia. Desta volta a furgo-escenario non se moveu, pero si que se moveron os centos de veciños e veciñas que bailaron e cantaron a festa ourensá.
Seguintes citas
A semana que vén tocará na Cidade Vella e nos Mallos. O sábado 15 será na Praza da Fariña (a ver cando lle devolven o nome real á Praza de Azcárraga), con obradoiro de cabazas e xogos infantís, música tradicional con Son D’Aquí, e viño e castañas. A queimada será campal.
Xa o domingo 16 toca o Mallosto, que se desenvolverá na praza do Mercado da Sardiñeira durante a mañá e ata a Sesión vermú, con Los Claretes.
Máis novas
A Masa Crítica celebrou o seu 20 aniversario reivindicando o papel da bici na cidade
