O portavoz do goberno local da Coruña, Miguel Lorenzo (PP), demandou ao goberno municipal convocar “con urxencia” a comisión especial para o seguimento da licitación da xestión da planta de lixos de Nostián, que non se reúne desde a súa constitución o pasado 4 de xuño.
Nunha rolda de prensa, o representante popular asegurou que un informe do Ministerio de Facenda reflicte que o novo contrato é “prexudicial” para a cidade. Lorenzo indicou que o seu grupo solicitara a documentación do Executivo central sobre o novo contrato, pero que esta lles foi “denegada” polo goberno local.
“Agora sabemos por que”, sentenciou, explicando que Facenda considera que a licitación “non é viable”. O PP denuncia que o goberno local incorre nun “dobre incumprimento”, xa que a pesar de destinar 330 millóns de euros, a planta continuará sen cumprir a normativa de reciclaxe e, ademais, non é viable economicamente porque “incorre en déficit”.
Lorenzo advertiu que “unha planta que non cumprirá a normativa de reciclaxe e que será deficitaria economicamente, non é unha planta viable para os coruñeses e pon en perigo o futuro dos traballadores“. O PP insiste na necesidade de convocar a comisión para abordar a situación.
A visión de SUMAR
Tamén fala hoxe do asunto o Movemento Sumar Coruña, que chama a atención sobre a advertencia da Oficina Nacional de Evaluación (ONE), que ve riscos claros no modelo de concesión de Nostián debido ao atraso acumulado polo Goberno municipal. A formación lembra que leva case un ano reclamando transparencia e planificación, sen que o Concello ofrecese avances nin explicacións suficientes.
A voceira de Movemento Sumar Coruña, Trinidad Palacios, afirma que “a chamada de atención da ONE confirma que o Concello chega tarde a unha decisión estratéxica. A parálise actual pode encarecer o servizo e afectar directamente ao recibo do lixo, que en 2026 vai aumentar sen garantías de mellora na recollida e tratamento dos residuos”.
A formación subliña que a situación tamén mantén nunha incerteza innecesaria ao Consorcio das Mariñas, que non coñece con claridade cal será o seu papel no futuro do tratamento de residuos na comarca. Para a formación, este bloqueo administrativo e político impide planificar con rigor unha das infraestruturas públicas máis relevantes da área metropolitana.
Para Palacios, “estamos diante dun debate capital para o futuro da cidade, e sorprende que continúe practicamente ausente da política local. Todo apunta a que se está deixando esta decisión como unha pataca quente para quen goberne en 2027, e iso é unha irresponsabilidade que a Coruña non se pode permitir”
