O concelleiro de Urbanismo, Rehabilitación e Vivenda, Francisco Dinís Díaz Galego, cifrou en 747 as vivendas de uso turístico na cidade que non cumpren coa ordenanza municipal. Foi nun pleno no que, por outra banda, apelou a unha contención de prezos nos alugueres coa declaración da mesma como mercado tensionado, en resposta ás críticas desde o grupo municipal do PP.

No debate dunha moción do BNG sobre as vivendas turísticas, o edil cuantificou en 54 os expedientes abertos por incumprimento da ordenanza aprobada este ano para regularizar a situación destes inmobles, algúns xa con procedementos xudiciais.

“A Coruña é a única cidade que freou o prezo dos alugueres en Galicia, non é unha baixada significativa, pero si un freo á escalada”, expuxo o concelleiro de Urbanismo, que rexeitou unha diminución da oferta de aluguer. “É moi superior ao resto de cidades de Galicia”, recalcou.

Todo iso despois de que o edil do PP Gonzalo Mora asegurase que houbo un “desplome” na oferta de vivenda coa declaración de mercado tensionado. Así o manifestou nun debate no que a concelleira do BNG Avia Veira reclamou que se impulse un estudo de cara á declaración dalgúns barrios como “saturados” en relación ao número de vivendas de uso turístico.

“Non se pode demonizar aos propietarios, cren que con esta ordenanza solucionan o grave problema de acceso á vivenda”, preguntou o edil do PP, que cifrou en “menos de 1.400” os pisos turísticos existentes.

Sobre este asunto, o concelleiro de Urbanismo aseverou que hai 747 rexistrados pola Xunta e que “seguen sen cumprir a ordenanza” e reprochou á Administración galega a inscrición no rexistro “sen solicitar licenza municipal”.

Respecto da moción, que se aprobou cos votos socialistas e nacionalitas e que expón un estudo por distritos sobre os pisos de uso turístico, apuntou que aínda é pronto para determinar se hai barrios saturados en relación a estes pisos e emprazou a avanzar no proceso de legalización, con 213 solicitudes neste momento. “Aínda quedarían máis de 400 que son legais e que non pasaron polo Concello para legalizarse”.

ESTACIÓN INTERMODAL

Por outra banda, no pleno aprobouse unha adenda ao documento sobre o financiamento das zonas comúns da estación intermodal. O portavoz do goberno local, José Manuel Lage, lembrou que é a segunda e que como a anterior non suporá unha modificación en canto ás partidas que destina o consistorio, “pero é necesario facer os axustes correspondentes a un convenio de 172.000 euros, a cantidade non varía apróbase a liberación duns 10.000 euros, contía que se compensa coas baixas de adxudicación”.

“Está a avanzarse por parte de todas as administracións na execución destas obras, séguese o calendario previsto polo que ao longo de 2026 poderemos gozar desta estación”, sentenciou para recalcar a “colaboración” entre administracións.

En canto a este punto, o concelleiro do PP Roberto Rodríguez aproveitou para expor que se sabe da ampliación da Ponte da Pasaxe ou do Viario 18. “Nada, ningunha ten proxecto nin consignación”, sinalou para reclamar que o Goberno central “salde as súas débedas” coa cidade en materia de infraestruturas. “Desde que Inés Rey é alcaldesa desbloqueáronse asuntos relevantes”, replicou Lage.

Pola súa banda, Avia Veira instou a ter unha posición máis esixente con Xunta e Estado para favorecer que os cidadáns teñan “boas frecuencias” para o acceso á mesma pero tamén en relación ao cumprimento de horarios por parte dos servizos ferroviarios.

No relativo á estación de autobuses, propiedade do consistorio, pediu que se dea resposta ás necesidades que ten a cidadanía, aludindo aos posibles usos que se lle poden dar. “E non deixar que pase o tempo”, advertiu.

Outras mocións

De resto, o Pleno aprobou por unanimidade unha moción do BNG para crear un Espazo Groba, tributo imprescindíbel ao principal vulto da música clásica galega contemporánea.
Nado en Ponteareas, o mestre Groba morou na nosa cidade, até o seu pasamento, durante máis de catro décadas. O seu inmenso legado -cun catálogo de máis de 700 obras- precisa primeiro de protección e logo de divulgación. O Espazo Groba acollería a sede da súa Fundación. Para a súa localización, a moción chama a que se teña en conta algún dos equipamentos públicos xa existentes na Coruña.

Ademais, na sesión aprobouse tamén a modificación do plan municipal de defensa contra os incendios forestais, de carácter obrigatorio na comunidade autónoma.