A Xunta formulou a declaración de impacto ambiental do proxecto parque eólico ‘Porto exterior da Coruña’, no concello de Arteixo, que promove Inditex Renovables. En concreto, conclúe que o proxecto é “ambientalmente viable” sempre que se cumpran, ademais do recolleito no estudo de impacto ambiental e a restante documentación avaliada, o condicionado e o programa de vixilancia ambiental que figuran ao longo da devandita declaración.

A Consellería de Medio Ambiente publica este luns no Diario Oficial de Galicia (DOG) o anuncio do 5 de decembro polo que se fai público o documento. Nel, a Xunta explica que o proxecto consiste na instalación e explotación dun parque eólico de 19,8 MW de potencia total (limitada a 18 MW) en Arteixo constituído por tres aeroxeradores de 6,6 MW potencia nominal unitaria (limitada a 6 MW) e a súa infraestrutura asociada, a liña de evacuación soterrada a 20 kV e 1.298 metros de lonxitude total e a ampliación da subestación ‘SET’ Inditex 132/20 kV.

Entre outras medidas, a declaración indica que se adoptarán as que “maximicen” a integración paisaxística. No caso da subestación transformadora/edificio de control, apunta que se empregarán materiais, texturas e cores que harmonicen coa contorna. Así mesmo, nos traballos de execución e acondicionamento dos camiños do parque “minimizaranse” os movementos de terras e coidarase que o firme contraste o menos posible coa contorna. Tamén co fin de “garantir unha axeitada integración paisaxística, terase especial coidado na aplicación das medidas protectoras, correctoras e de restauración e integración paisaxística que figuran no estudo de impacto e integración paisaxística”.