O grupo municipal do PP no Concello da Coruña denunciou a existencia de “múltiples deficiencias” no centro cívico do Birloque, esixindo melloras inmediatas nas instalacións. Nun comunicado, os populares amosaron a súa sorpresa polo deterioro do edificio “só un ano despois dunha reforma que custou un millón de euros“. Segundo o PP, o mal estado dos chans e teitos débese á “falta de control municipal” durante a execución das obras realizadas este mesmo ano.
O voceiro do grupo municipal, Miguel Lorenzo, sinalou ademais que este problema é un reflexo da falta de mantemento xeral que sofre o barrio. Por este motivo, Lorenzo instou ao Executivo local a acometer investimentos urxentes na zona para corrixir os fallos estruturais do centro cívico e atender as necesidades veciñais que, segundo denuncia, foron ignoradas tras a finalización do proxecto de reforma.
