Os pais de Diego Bello chegaron xa á Manila (Filipinas) para declarar no xuízo contra tres policías acusados da súa morte. Farano o próximo 16 de xaneiro aínda que, segundo explicou a propia nai, Pilar Lafuente, a Europa Press atópanse xa alí porque teñen primeiro que facer unha declaración xurada e estar cos avogados “para ver como vai ser todo”. A declaración está previsto que se inicie ás 08.30 horas do venres –ás 01.00 horas de España–. Por este crime xúlgase a tres policías, que se enfrontan a acusacións de asasinato e suplantación de probas en relación coa morte do novo, en xaneiro de 2020, na illa filipina de Siargao.

En xuño de 2025, o Tribunal de Primeira Instancia Rexional da República de Filipinas negou a liberdade baixo fianza dos tres policías acusados de matar o coruñés Diego Bello. De acordo coa investigación, non houbo un enfrontamento armado co mozo, como sostiveron inicialmente os axentes. Ademais, o informe forense indica que Bello foi alcanzado por disparos mentres xa se atopaba no solo. De feito, a propia Comisión de Dereitos Humanos de Filipinas rexeitou os argumentos esgrimidos polos policías en relación á morte no contexto dunha operación antidroga.

Todo iso no marco dun traballo en colaboración coa Oficina Nacional de Investigación (NBI) filipina. “Non hai ningún informe novo”, aseverou a nai respecto dos xa emitidos, entre eles o do NBI que descartou que a morte de Diego Bello estivese vinculado ao tráfico de drogas e a un operativo relacionado con esta cuestión, como sostiveron inicialmente os acusados. De feito no informe da Comisión, de 2020, descartábase esta cuestión en base a unha análise detallada dos feitos e de testemuños, considerando, entre outras cuestións, que houbo unha “violación” dos protocolos operativos.