A Xunta de Galicia ampliou para este venres a alerta laranxa por temporal costeiro ao litoral do oeste da Coruña. O aviso xa está activo este xoves no litoral noroeste desta provincia e no de Lugo. Co fin de garantir a seguridade dos bens e as persoas, a Dirección Xeral de Emerxencias e Interior informou da situación a través do 112 Galicia aos concellos das provincias afectadas, deputacións, servizos provinciais, agrupacións de voluntarios de Protección Civil e clubs náuticos.
Segundo a Axencia Estatal de Meteoroloxía (Aemet), o fenómeno meteorolóxico adverso estenderase nas primeiras horas do venres ao oeste da Coruña. Espérase mar combinado con ondas de ata seis metros e ventos de ata forza oito. Debido a esta alerta laranxa, a Secretaría Xeral para o Deporte anunciou a suspensión da actividade deportiva Xogade e federada no mar nos concellos afectados.
A Xunta lembrou nunha nota de prensa a importancia de manterse afastado da liña de costa, como diques, rompentes e paseos marítimos. Tamén solicitou que se extremen as medidas de seguridade á hora de realizar calquera actividade no mar e que se revisen os cabos e amarres das embarcacións.
