Presentouse esta mañá de venres no Museo de Belas Artes a exposición colectiva realizada entre artistas e entidades sociais da cidade. “Identidades, as artes para a inclusión social” é un proxecto artellado polo propio Museo e a Asociación de Amigos do Museo, que se desenvolveu durante o outono do pasado, onde artistas impartiron diferentes obradoros creativos con persoas vulnerables de diferentes colectivos.
O artista árabe afincado en Monte Alto, Ali Ali, por exemplo, estivo pintando coas persoas en réxime de semiliberdade do Centro de Inserción Social; Víctor Ares fixo porcelana coa xente do Centro Ocupacional Pascual Veiga; Manel Cráneo debuxou varios cómics coas usuarias da Fundación Érguete; Raúl Álvarez pintou lenzos con migrantes da Cruz Vermella; Iria do Castelo fixo gravado tamén con migrantes do colectivo Ecos do Sur; Susana Anta aprendeulles cerámica ás persoas sen fogar do Fogar de Santa Margarita; Xurxo Fernándes uniu os cantes tradicionais galegos cos senegaleses de Ecodesarrollo Gaia; Tatiana Medal fixo acrílio coa xente da Cruz Vermella; Manuel Suárez pintou coas persoas da Fundación Juan Soñador, e Lara Pintos fixo acrílico tamén coas persoas residentes no Fogar Sor Eusebia.
Tamén a polaca do Ensanche Gosia Trebacz pintou o rap cos internos do Centro Penitenciario de Teixeiro, que non puideron saír a esta presentación pero que si quixeron enviar un vídeo en clave de rima. Foi unha das proxeccións realizadas durante a presentación, acompañada da curta “La cicatriz”, sobre violencia de xénero, realizada polos Amigonianos coa axuda da cineasta Ángeles Huerta.
O resultado é unha fermosa e singular exposición, feita por pesoas vulnerales, que descubriron que a arte pode ser un fabuloso elemento inclusivo e de aprendizaxe interior e colectiva.
View this post on Instagram
