A Xunta activou para este luns, 12 de xaneiro, a alerta laranxa por temporal costeiro no litoral das provincias da Coruña e Pontevedra co fin de “garantir a seguridade dos bens e persoas”.

Tal e como trasladou o Goberno galego nunha nota de prensa, a Dirección Xeral de Emerxencias e Interior, da Consellería de Presidencia, Xustiza e Deportes, informou da situación a través do 112 Galicia aos municipios das provincias afectadas, deputacións, servizos provinciais e agrupacións de voluntarios de Protección Civil e aos clubs náuticos, entre outros.

Segundo a Axencia Estatal de Meteoroloxía (Aemet), o fenómeno meteorolóxico adverso estará activo desde primeiras horas da mañá do luns. Así, espérase vento do sur ou suroeste de forza oito e mar combinado do suroeste con ondas de cinco metros.

Por estes motivos, anunciouse a suspensión da actividade deportiva no mar, tanto federada como do programa Xogade, nos municipios afectados.

Con todo, a Xunta lembrou a importancia de manterse afastado da liña de costa e de extremar as medidas de seguridade á hora de realizar calquera actividade no mar.