Un accidente múltiple, con cinco coches implicados e unha muller ferida leve causou retencións na mañá deste luns no acceso á Coruña pola avenida Alfonso Molina. Fontes da Policía Local consultadas por Europa Press, confirmaron que o suceso tivo lugar sobre as 09.45 horas no quilómetro 2,700 da AC-11, dirección entrada á cidade. “Xusto debaixo do viaduto da autoestrada, na zona de Palavea”, especificaron.

Até alí desprazouse o 061 para asistir a unha condutora que resultou ferida leve. “Trátase dunha colisión por alcance“, confirmaron e os coches “estiveron no carril 15 minutos apróximadamente ata que foron retirados á beiravía”. Así, un dos carrís quedou cortado o que provocou retencións.

“Tráfico lento desde a Ponte da Pasaxe até as 10.05 horas apróximadamente”, detallaron aínda que apuntaron que os vehículos “non chegaron a parar”. “Ían máis lentos porque estaban no carril cortado”, dixeron. “Non alcanzaron os 500 metros de retencións“, coincidiron desde o Centro de Xestión de Tráfico do Noroeste. Horas despois, “aínda queda algún vehículo” na zona, confirmaron.

SEGUNDO ACCIDENTE

Un segundo accidente múltiple rexistrado nesta xornada, esta vez ás 15.35 horas, en sentido entrada A Coruña, obrigou a cortar dous carrís na Avenida de Alfonso Molina e deixou ferida leve a unha moza de 22 anos, que foi trasladada ao Complexo Hospitalario Universitario da Coruña (Chuac). Segundo informou a Policía Local, o sinistro produciuse á altura do barrio de Matogrande e estiveron implicados un bus e tres turismos. Dos tres carrís, estiveron cortados tanto o esquerdo como o central ata que se limpou a calzada e retiráronse os vehículos accidentados. A situación provocou retencións de tráfico.