A Audiencia Provincial da Coruña condenou a tres persoas a un total de 20 anos de prisión por un delito contra a saúde pública, na modalidade de tráfico de drogas, na zona de Ferrol. Os feitos recollidos na sentenza remóntanse a unha investigación iniciada en outubro de 2024, na que os axentes detectaron desprazamentos constantes a Madrid para a compra de cocaína que posteriormente era distribuída na comarca de Ferrolterra.
A sentenza establece penas diferenciadas para os tres implicados: o primeiro foi condenado a seis anos de prisión e unha multa de 200.000 euros; o segundo procesado recibiu outra pena de seis anos de cárcere e unha multa de 300.000 euros; mentres que o terceiro home foi condenado a sete anos de prisión e unha multa de 130.000 euros.
Ademais das penas de privación de liberdade, a sala decretou o comiso definitivo da totalidade do diñeiro, teléfonos, armas e demais obxectos intervidos durante o operativo policial. Cabe destacar que a sentenza aínda non é firme, xa que os condenados poden interpor un recurso de apelación ante o Tribunal Superior de Xustiza de Galicia (TSXG).
