O pleno da Deputación da Coruña aprobou, co voto de PSOE, BNG e Alternativa dos Veciños, e en contra do PP, unha moción presentada por socialistas e nacionalistas para instar á Xunta unha “solución inmediata” ao conflito do transporte de viaxeiros por estrada na provincia coruñesa. Nela, pide á Administración galega que “se implique e actúe” como autoridade laboral “e como administración responsable do mal funcionamento dun servizo público esencial“.
Foi nunha sesión na que aprobou unha declaración institucional, con respaldo de todos os grupos políticos, en apoio ás reivindicacións laborais do Grupo Losán, cuxa persoal anunciou mobilizacións na defensa dos seus empregos. Por outra banda, aprobou un investimento de 1.150.848 euros para mellorar infraestruturas provinciais, en concreto na estrada provincial DP-7804 de Val do Dubra a Santiago, no termo municipal da capital galega.
Esta actuación completará as obras de ampliación e mellora do trazado que a Deputación está a ultimar neste viario, cun investimento de máis dun millón de euros, co obxectivo de ofrecer unha vía “máis segura, moderna e adaptada ao elevado volume de tráfico que soporta ao conectar Santiago con Val do Dubra”. O prazo de execución previsto é de cinco meses.
