A Garda Civil detivo a tres homes, supostos integrantes dun grupo criminal dedicado ao furto continuado de cobre e material da central térmica de Sabón-Arteixo (A Coruña), e que formaban parte do persoal da empresa.

Segundo informaron fontes da Comandancia, os implicados, detidos en Arteixo, Cerceda e Sigüeiro, coordináronse para roubar “unha inxente cantidade” de barras de cobre e outros metais, valorados en máis de 250.000 euros.

A investigación comezou en xullo de 2025, tras unha inspección de seguridade rutineira na central. Os responsables da explotación detectaron a falta de barras de cobre fundamentais para os xeradores, cuxa complexidade técnica implica que só se fabrican na cidade de Nova York (EE.UU.), elevando o seu valor por encima dos 250.000 euros.

A Garda Civil constatou que os sospeitosos se concertaron para, aproveitando a súa condición de traballadores, roubar ese material. Para iso, usaban as ferramentas e vehículos da propia empresa, cos que accedían aos almacéns.

Alí cortaban as barras de cobre antes de sacalas do recinto. Ademais do cobre, tamén roubaron máis dunha tonelada de tubos de aceiro inoxidable, baterías de chumbo, latón e residuos valorados noutros 15.000 euros.

As pescudas permitiron localizar un establecemento de xestión de residuos próximo á central. Alí, os detidos realizaron máis de 60 operacións de venda de material, que coincidía co material subtraído entre marzo de 2024 e decembro de 2025.

DETENCIÓNS

A investigación culminou co tres detencións este mes de xaneiro. Así, o pasado día 3 detívose a dous dos sospeitosos, e o terceiro foi arrestado o día 12.

Aos detidos impútaselles un delito de pertenza a grupo criminal e un delito continuado de furto, este último agravado por tratarse de material condutor. As dilixencias e os detidos foron postos a disposición da autoridade xudicial competente.