Representantes da CIG denunciaron unha praga de moscas nun dos quirófanos do Hospital QuirónSalud da Coruña e demandaron unha “actuación decidida” por parte da Xunta ante unha situación que cualificaron de “escandolosa”. Pola súa banda, desde o hospital din que se cumpren “os protocolos”.
Nunha comparecencia ante o centro, o secretario de Acción Sindical da CIG na comarca da Coruña, Ernesto López, e Isabel Golpe, responsable de CIG-Saúde na comarca, pediron unha intervención “inmediata” dos servizos sanitarios. “É unha alerta sanitaria“, insistiu esta última ante o feito de que “nunha zona estéril haxa unha praga”. E é que xunto a moscas de “gran tamaño”, apuntaron á existencia de roedores por unha situación que, segundo explicaron, desde o hospital atribúen a cadávares de animais, posiblemente gatos.
Desde a CIG, especificaron que isto dáse desde principios de xaneiro e descartaron que haxa unha praga de roedores, si de moscas, pero precisaron que os hai na contorna e que a súa presenza obedece “aos cadávares”. “É un tema moi grave que nun hospital, no bloque cirúrxico, haxa unha praga descontrolada de moscóns con presenza de ratos”, recalcou Ernesto López, quen apostilou que “non saben moi ben por que está motivada, cren que por cadáveres de gatos”.
“HAI ALGO”
Por outra banda, explicou que contrataron desde o hospital a unha empresa de pragas. “Dinlles que hai algo que o motiva pero non os dan erradicando e en principio suspenden a actividade cirúrxica pero é moito diñeiro e renóvana”, indicou respecto da situación nun dos quirófanos, pechado parcialmente un día en xaneiro, o día 7, segundo expuxeron.
“Alguén ten que controlar as condicións minímas de hixiene“, insistiu. Mentres, desde o centro hospitalario han asegurado a Europa Press que o hospital mantén a súa actividade asistencial con total normalidade e como sempre. “Cumprindo todos os protocolos de seguridade e garantindo en todo momento a atención e seguridade dos pacientes”, engadiron.
