Volverá haber folga este mércores no sector do transporte de viaxeiros por estrada da provincia da Coruña (non no transporte urbano). Así o acordaron as asembleas de traballadores o pasado venres rexeitando o preacordo asinado por CCOO e TXG, e así se deriva da falta de avances na negociación do convenio colectivo trala reunión mantida onte entre patronal e sindicatos.
Unha das claves da falta de acordos é a división sindical. Como xa aconteceu a semana pasada, CCOO e UXT eran partidaron de asinar as medidas xa acordadas, mentres que a CIG se mantén impacable para blindar un convenio máis favorable para os traballadores.
Esa división revélase nos dous comunicados enviados por ambas partes, nas que se botan a culpa da falta de avances na negociación.
UXT e CCOO
Para os dous sindicatos estatais a reunión mantida onte no Consello Galego de Relacións Laborais ”os dá a razón”. Aseguran que as negociacións continuaron na mesma liña “deixando constancia en acta de diversos aspectos do texto negociado”. Así, aseguran que hai avances que teñen validez xurídica, como a aplicación dos atrasos a todos os conceptos, non só sobre o salario Base; ou o establecimento dun plus de xornada continua de 8€/día, que non impide o cobro das dietas en horario laboral. Aseguran que o texto non supón un empeoramento das condicións actuais nin do recollido no prego de condicións e cláusulas sociais, e que se esixen un míninmo de 2 horas diarias de contratación, e que as relacións laborais deberán ser regularizadas e actualizadas. Porén, indican que a xubilación parcial e a incapacidade temporal non están incluídas nos puntos de mediación.
A visión da CIG
”UGT e CCOO impiden seguir negociando e pretenden revivir o preacordo enterrado polo persoal”, aseguran dende a CIG, que promoven a negociación dun “acordo novo” “logo de contundente resultado das votacións”, que consideran “enterrou a proposta da patronal, UGT e CCOO”. “Ese acordo está morto e hai que traballar sobre unha proposta nova, porque os traballadores e traballadoras xa dixeron que non lles valía. Agora non só bloquean a posibilidade de negociar e acadar un texto mellor, senón que co subterfuxio da aclaración na acta, pretenden impor de novo o mesmo acordo matizado”, critica Ernesto López Rei, representante da CIG.
Por iso lamentan que non se realizase ningunha negociación, “xa que todo o tempo estivo dedicado a que a patronal respondera a unha serie de preguntas sobre os termos do preacordo rexeitado. Estas consultas xa estaban pactadas previamente e o único que foron ao Consello Galego hoxe foi a escenificar novemente algo xa precociñado e cuxas respostas xeran máis confusión, querendo maquillar un preacordo inasumíbel. Tanto UGT como CCOO manifestaron que precisan dous máis para someter ás súas bases o preacordo coas aclaracións e que o xoves ás 13 horas, traerán a resposta”.
“É unha irresponsabilidade e un atentado á democracia que estas alturas do conflito, UGT e CCOO manifesten na mesa que precisan dous días a maiores para aclarar a súa posición sobre o preacordo. Estamos ante unha imposición inaceptábel e un novo balón de osíxeno á patronal. O que está pasando na negociación deste convenio é inaudito e intolerábel”, valoran dende a central sindical.
Folga este mércores
Con este panorama, este mércores o traballadores están chamados pola CIG a secundar unha nova xornada de folga. Ademais, a CIG convocará asembleas de traballadores e traballadoras hoxe, martes día 10 pola noite, nas tres cidades, para explicar o acontecido e organizar a resposta co sector.
Máis novas do conflito
A folga do transporte por estrada na Coruña volverá o mércores se non hai acordo
Os traballadores do transporte rexeitan o preacordo do convenio e poñen de prazo ata o luns
