Necesaria era outra nova infraestrutura deportiva nun barrio de familias novas como Novo Mesoiro. Falamos dun dos da cidade coa idade media máis baixa polo que os espazos deportivos fanse máis que necesarios.

Cumprindo esa demanda, o Concello abriu á veciñanza o novo espazo de ocio urbano ao aire libre que comezou a habilitarse a finais deste verán nunha área axardinada en desuso tras os bloques de vivendas da rúa Ribeira Sacra e o rego de Moitos. O proxecto desenvolveuse sobre unha extensión de máis de 1.500 metros cadrados, e inclúe espazos individuais para a práctica deportiva de calistenia, break e bailes urbanos, baloncesto, tenis de mesa, xadrez e tamén un pequeno rocódromo.

“O proxecto é moderno, é amplo e mellorará substancialmente o acceso ao ocio ao aire libre para os rapaces e rapazas do barrio. O compromiso do Goberno de Inés Rey é levar as melloras a todos os barrios. E nesa tarefa estamos a cumprir, agora cunha das zonas de xogo mellor equipadas da cidade”, subliñou a concelleira de Infraestruturas e Mobilidade, Noemí Díaz.

O investimento do Concello neste proxecto foi de máis de 230.000 euros, e a actuación está enmarcada no paquete de medidas para abordar melloras estruturais en todos os barrios incorporando as demandas expresadas pola veciñanza e as súas asociacións. As áreas verdes situadas na contorna aínda seguirán valadas uns días ata que o novo céspede arraigue.