Hoxe volve haber folga no sector sector do transporte de viaxeiros por estrada na provincia da Coruña. Trala dividida visión dos sindicatos, hoxe poñemos os oídos na patronal, que vén na “falta de información” ou a “desinformación” as causas do rexeitamento maioritario de traballadores e traballadoras ao preacordo sobre o convenio subscrito por CCOO e UXT e que a CIG non asinou por entender que inclúe “avances mínimos”.
Nun comunicado, e en referencia á reunión mantida o luns — o xoves convocarase outra aínda que a CIG mantén a súa convocatoria de paro indefinido desde este mércores –, afirma que “coa reactivación da negociación colectiva do sector de transporte de viaxeiros en autobús da provincia da Coruña, as organizacións empresarias entenden que onte se puxo de manifesto” esta “falta de información”.
“Na reunión cos sindicatos de onte volveron examinarse un a un os distintos asuntos que había sobre a mesa co obxectivo de evitar novas interpretacións confusas ou inadecuadas”, engade.
“Deste xeito, no difícil contexto actual, nos últimos 7 anos o sector sufriu un incremento de custos dun 8,4%, o preacordo suporía para o conxunto de traballadores do sector un incremento salarial do 22,1%, 15,3% entre os anos 22 a 24, 3,4% para o 2025 con efectos retroactivos e 3,4% con revisión do IPC real para o 2026”.
A maiores, recalca, “o documento inclúe propostas para o fomento da xornada continuada, cun plus de 8 euros diarios, a redución da xornada anual ás 1.800 horas, dous días de asuntos propios, plus de dispoñibilidade horaria para servizos discrecionales do 60% do salario basee, plus de absentismo de 1.000 euros anuais, acumulación do permiso de lactación en 17 días continuados”, cita, entre outras cuestións.
“A vontade da patronal é hoxe aclarar todas as cuestións dubidosas ou interpretadas erroneamente a través da central CIG, con absoluta vontade de diálogo e confiando en que ninguén caia no erro de querer impor o seu criterio”.
Por outra banda, as asociacións empresariais sinalan que a negociación colectiva “é algo dinámico e que en breve se iniciará a do convenio para o 2027”.
Máis novas do conflito
A folga do transporte por estrada na Coruña volverá o mércores se non hai acordo
