O goberno local da Coruña destacou “a baixada do 10%” do prezo medio do aluguer no inicio deste ano con respecto á situación antes da declaración de mercado como Zona Tensionada. “A excepción do mes de decembro, o prezo medio mensual do aluguer na Coruña non baixou dos 700 euros en todo o ano 2025”, sinala nun comunicado no que subliña que a cidade “consolida a moderación dos prezos do aluguer”.

En alusión aos últimos datos dispoñibles no Observatorio de Vivenda de Galicia, indica que “o prezo medio situouse en xaneiro de 2026 nos 663,9 euros, 67,1 euros menos que no prezo medio de 2025 (entre xaneiro e decembro, 731 euros) e 22,1 euros menos respecto de decembro de 2025 (686 euros)”.

“O dato é especialmente significativo porque non se rexistraban estes niveis de prezo desde xullo de 2024, momento no que comezou a maior escalada do aluguer na cidade“. “Ademais, se se compara con agosto de 2025, primeiro mes completo coa declaración de zona residencial tensionada xa en vigor, o prezo medio situábase en 735,2 euros, a diferenza é de máis de 71 euros”, remarca.