A alcaldesa da Coruña, Inés Rey, asegurou que é o Executivo autonómico o encargado de decretar as alertas meteorolóxicas e quen estipula as “excepcións” para practicar deportes como o surf en condicións de mal tempo. “Estamos todos á espera de que a Xunta tome unha decisión respecto diso”, manifestou a alcaldesa da cidade herculina, Inés Rei. Foi a preguntas dos xornalistas sobre a reunión “cordial” mantida o mércores entre representantes do colectivo de surfeiros, a concelleira de Seguridade Cidadá, Montse Paz, e o director de Seguridade Cidadá, Carlos García Touriñán.

“É a Xunta a que ten que establecer as excepcións se as hai”, insistiu a rexedora para citar “se con alerta se poden practicar deportes no mar e en que praias se poden facer”. “Nós imos acatar o que mande a Administración autonómica“, destacou.

O conflito xurdiu tras ser multado polo goberno local, o pasado mes de novembro, o campión galego e nacional de surf Pablo Montero por meterse no mar con alerta laranxa meteorolóxica nunha praia do paseo marítimo da cidade herculina.