O Tribunal Superior de Xustiza de Galicia (TSXG) confirmou a condena a 9 anos de prisión imposta pola Audiencia da Coruña a un home que violou en 2024 a unha muller ebria nos arredores dunha discoteca da cidade. Na súa resolución, o tribunal rexeita os argumentos da defensa e subliña que era evidente o estado de embriaguez da vítima, polo que o acusado non podía ignoralo. “Desde Noé ata os nosos días, calquera home medio coñece os síntomas e os efectos do alcol”, recolle o fallo.
A sección segunda da Audiencia Provincial da Coruña xa condenara en outubro do pasado ano a un veciño da cidade polos feitos ocorridos na madrugada do 2 de febreiro de 2024 nas inmediacións dunha discoteca situada na zona do Palacio de Exposicións e Congresos (Palexco). Os maxistrados consideraron os feitos constitutivos dun delito de agresión sexual con acceso carnal, sen violencia nin intimidación, pero sen consentimento, ao entender que o acusado se aproveitou da vulnerabilidade dunha muller que, polo seu estado de embriaguez, carecía de capacidade de comprensión e decisión.
REXEITAMENTO DO ARGUMENTO DA DEFENSA
No recurso presentado ante o TSXG, o procesado sostivera que non se podía acreditar que a muller estivese ebria, xa que non se lle practicara unha análise toxicolóxica. Porén, o alto tribunal rexeita este argumento e considera que as probas practicadas acreditan de forma “pétrea” que a vítima sufría unha “aguda intoxicación etílica”, atopándose desorientada, tambaleante e incapaz de prestar consentimento. “Pouco importa que entón non se lle fixese unha análise toxicolóxica”, indica a sentenza, que insiste en que os síntomas eran evidentes.
O TSXG lembra ademais que o acusado non nega que existise relación sexual, algo que tamén queda acreditado pola proba xenética, e conclúe que a vítima tiña anulada a súa capacidade de autodeterminación, polo que non podía prestar ningún tipo de consentimento. “Non é factible unha dúbida racional acerca de que estamos en presenza dos elementos nucleares do tipo penal: relación sexual inconsentida”, resume o tribunal.
OS FEITOS PROBADOS
Segundo a sentenza, a muller acudiu a unha discoteca da avenida do Porto da Coruña xunto a dúas amigas, onde consumiu varias bebidas alcohólicas. En determinado momento comezou a sentirse desorientada e a cambalearse, o que chamou a atención dunha das súas amigas, que a sacou da zona de reservados na que se atopaban. Posteriormente, a vítima accedeu sen autorización a outra zona do local e mostrouse agresiva cun traballador, polo que foi expulsada do establecemento.
Entre as 03.30 e as 04.16 horas, segundo recolle a resolución, intentou en numerosas ocasións convencer aos porteiros para que a deixasen volver entrar, xa que dentro quedaran o seu abrigo, o teléfono móbil e as chaves da súa casa. Durante ese tempo subiu varias veces as escaleiras da entrada e chegou a caer ao chan nunha ocasión. Ás 04.18 horas, xa nun estado de forte intoxicación etílica e con dificultades para manter o equilibrio, decidiu afastarse da entrada e esperar nunha zona próxima a Palexco.
Segundo considera probado o tribunal, o acusado observou toda a escena e decatouse das mermadas condicións psicofísicas da vítima, polo que decidiu aproveitar esa situación para satisfacer os seus desexos sexuais. O home achegouse a ela e agarrouna pola cintura cando trataba de volver á discoteca. A muller intentou apartarse, pero non conseguiu librarse del, que a levou ata o lateral de Palexco, onde caeu ao chan.
Nese momento, segundo a sentenza, o acusado violouna aproveitando a súa incapacidade de autodeterminación. Dúas persoas que pasaban pola zona decataron do sucedido, chamaron a atención do agresor e deron a voz de alarma. Tras os feitos, a vítima marchou cara á súa casa, pero ao non ter as chaves do domicilio quedou durmida no felpudo da porta ata a mañá seguinte, cando o presidente da comunidade de veciños chamou a un cerraxeiro para abrir o portal.
