O festival coruñés Noites do Porto anunciou este luns a incorporación de Curtis Harding como primeira confirmación da súa edición de 2026, na que o artista estadounidense ofrecerá o próximo 30 de xuño un concerto no Inn Club da Coruña.

A cita servirá para que Harding presente en directo o seu novo traballo, ‘Departures & Arrivals: Adventures of Captain Curt’, nunha actuación que terá ademais un valor engadido para o público galego: será a única oportunidade de velo en directo en Galicia este verán. Segundo explicou a organización nun comunicado, o músico norteamericano é “unha das voces máis relevantes da escena do soul a nivel internacional”, e encaixa plenamente no espírito do evento pola súa capacidade de “transformar un concerto nun rito compartido”.

A presenza de Curtis Harding marca tamén o arranque dunha edición na que Noites do Porto adianta a súa actividade a finais de xuño, xa que este ano o festival desenvolverase entre o 22 de xuño e o 5 de xullo. A organización define o evento como un “festival ao contraxeito que se amarra ao ecosistema cultural da cidade”, unha fórmula coa que busca reforzar a súa identidade propia dentro do calendario musical e a súa conexión coa vida cultural coruñesa.

Harding actuará en total tres veces en España ao longo deste verán, pero a parada da Coruña será a única prevista en Galicia, o que converte a cita nun dos reclamos destacados desta nova edición. As entradas para o concerto xa están á venda a través das plataformas Ataquilla e Ticketmaster, segundo informou a entidade promotora.