A Policía Nacional investiga a tres persoas vinculadas aos ‘Riazor Blues’ por un delito leve de lesións e outro de ameazas producidos o pasado 13 de xaneiro antes do partido de Copa do Rei que enfrontaba ao RC Deportivo e o Atlético de Madrid na Coruña.
Segundo detallou a Policía nunha nota de prensa, durante esa xornada, un cidadán denunciou ser vítima de lesións e ameazas por parte de tres individuos sobre as 15.30 horas nun altercado producido na Avenida de Peruleiro. Ese mesmo día, ás 21.00 horas, xogábase a eliminatoria da Copa do Rei entre o Dépor e o Atlético de Madrid, declarado partido de alto risco, aínda que as primeiras investigacións realizadas descartaron que este enfrontamento se producise entre inchadas opostas.
Con todo, no marco desta investigación, os axentes identificaron ao presuntos tres autores do incidente que, tal e como apuntou a Policía, “estarían vinculados ao grupo ultra ‘Riazor Blues'”. Segundo destacou a Policía, trátase de “previr, investigar e monitorar estes fenómenos violentos” en relación aos grupos ultra deportivos, dentro do Plan de Redución de Violencia en Eventos Deportivos, así como da aplicación da Lei 19/2007 contra a Violencia, a Xenofobia e a Intolerancia no Deporte.
