A Coruña acollerá dous concertos consecutivos de Vetusta Morla, o venres 6 de novembro e o sábado 7, dentro da súa volta aos escenarios con ‘Xira de volta. Cancións de ida’. Así o informa o consistorio, que lembra que este xoves, ás 12.00 horas, abriuse a venda xeral de entradas tanto para a súa actuación do sábado 7 de novembro como para a nova data.

“A alta demanda de entradas para a primeira data confirmada posibilitou a celebración dunha segunda actuación”, explica o goberno local. “A Coruña volve acoller en exclusiva en Galicia un dos grandes concertos do ano a nivel nacional”, subliña a rexedora, Inés Rey. Vetusta Morla xa estivo na Coruña en 2024 cun concerto na praia de Riazor, unha cita que reuniu a máis de 50.000 persoas como cabezas de cartel do Festival Noroeste Estrella Galicia.