O proceso de licitación do Máster Plan de Coruña Marítima avanza cara á transformación futura do porto e da cidade coa selección de cinco equipos finalistas entre as 14 candidaturas válidas que se presentaron ao concurso, segundo informan o Concello e a Autoridade Portuaria.
A pesar de non se publicitar no perfil do contratante da APAC, nin cal foi a mesa de contratación ou órgano de asistencia que fixo a selección, nin a acta de valoración das propostas seleccionadas, a realidade é que temos un compendio de 28 empresas de todo o planeta, con actuacións destacadísimas en cidades como Liverpool, Amberes, Copenhague ou Sydney, que contan en total con 13 empresas galegas entre as súas UTEs.
Os equipos seleccionados disporán dun prazo de catro meses para presentar as súas propostas. Deste xeito, no terceiro trimestre deste ano prevese elixir a proposta máis axeitada, atendendo a criterios como a calidade técnica, a funcionalidade, os aspectos ambientais e económicos, así como a ordenación urbanística global.
Os cinco equipos clasificados (segundo orde de chegada das ofertas) son:
Reflexións
Con todo, os colectivos que estiveron avaliando o proceso de creación das Bases do concurso volven incidir no que xa dixeron no seu día: As propias bases non están ben formuladas.
Así o entende Benedito Álvarez. Un dos membros da activa Plataforma Defensa do Común segue defendendo que unhas “bases do concurso erróneas máis un proceso restritivo, dan un resultado final que non concorda co que A Coruña precisa”.
E afonda nesta lectura: “Cando as Bases apostan pola privatización do espazo portuario (por moito que diga o contrario o goberno local) e a subsariedade do uso portuario, cando as Bases do concurso manteñen a vixencia dos Convenios do 2004, cando esas mesmas Bases manteñen a débeda como un condicionante sobre-determinante da futura ordenación e cando, ademais, se optou polo procedemento restrinxido e limitado a un máximo de 5 (o tope mínimo legal)… pois sendo as condicións de partida así… o resultado do concurso non vai ser o que o porto e a cidade deberían agardar”, lamenta, sen entrar a valorar a calidade dos equipos finalistas.
Pola súa banda, Ruth Varela, presidenta do Colexio de Arquitectos de Galicia, volve insistir en aspectos xa comentados: “Considero que é preciso reconsiderar as bases para axustar os obxectivos do concurso ás necesidades da cidade e que é preciso tamén reconsiderar a forma de participación para que sexa o coñecemento local o que guíe as decisións, en base ás necesidades reais do Porto e da cidade que coñece moito mellor. Ademais, volvería a pedir maior reflexión e maior prudencia para evitar un resultado que, en esencia, vai ser unha lousa para o futuro do Porto da cidade e unha hipoteca para os seus cidadáns”, asegura.
Máis novas
https://xornaldacoruna.gal/2025/09/18/debe-condicionar-o-p
O fallo do concurso do deseño da fachada marítima coruñesa notificarase “no outono de 2026”
