Incide de novo na lamentable situación do transporte metropolitano a Federación de Asociacións Veciñais da Coruña e Área Metropolitana. A FAVA amosa a súa preocupación pola falta de información oficial sobre o novo deseño de paradas e itinerarios do transporte metropolitano dependente da Xunta de Galicia. A entidade que vai manter próximamente unha reunión con directora territorial, considera que esta ausencia de datos está a impedir que as asociacións veciñais e a cidadanía poidan coñecer con antelación os cambios previstos e avaliar o seu impacto real na súa mobilidade diaria.
Nas últimas semanas, diversas asociacións da área metropolitana trasladaron á Federación o seu malestar pola opacidade do proceso, denunciando que se están anunciando modificacións de servizos e que aínda non contan cunha explicación clara das razóns e consecuencias que no servizo poden ter estes cambios.
A Federación subliña que a planificación do transporte metropolitano é un servizo público esencial, e lembra que calquera reestruturación debe realizarse con criterios de transparencia. Así mesmo, a entidade veciñal considera imprescindible que a administración autonómica habilite un período de exposición pública suficiente, no que as asociacións veciñais da Coruña e a cidadanía poidan analizar a documentación, formular alegacións e coñecer con detalle a realidade dos cambios previstos. Sen esta fase de participación, a cidadanía queda excluída dun proceso que afecta directamente á súa mobilidade, ao acceso a servizos e á conexión entre barrios e municipios.
A Federación lembra que a área metropolitana da Coruña precisa un sistema de transporte coherente, accesible e planificado con visión territorial, e insta á Xunta a rectificar a falta de transparencia, garantir información veraz e completa antes de calquera modificación.
Máis novas relacionadas
FAVA denuncia os problemas do transporte metropolitano dependente da Xunta
Albalat, A Cidade das Rías, a metrópole e o transporte público
CSIF denuncia “falta de planificación” na nova cabeceira de autobuses interurbanos da Coruña
