O presidente da Deputación da Coruña e máximo responsable do Consorcio Contraincendios da Coruña, Valentín González Formoso, e o alcalde de Arteixo, Carlos Calvelo, oficializaron este venres a entrega das obras do novo parque comarcal de bombeiros situado no polígono de Morás.

Ao acto asistiron tamén o deputado de Economía e Facenda, José Ramón Rioboo; o director xeral de Emerxencias, Santiago Villanueva, e o xerente do Consorcio Provincial Contraincendios, José Luís Barca.

Esta nova infraestrutura substitúe á antiga base de Sabón. O traslado definitivo da actividade e do persoal completarase nos próximos dous meses.

O novo complexo sitúase nunha parcela de 4.000 metros cadrados cedida polo Concello de Arteixo nunha localización que garante unha conexión inmediata coa autovía A-6 e a autoestrada AG-55.

Esta mellora xeográfica busca reducir os tempos de resposta ante emerxencias non só en Arteixo, senón tamén nos municipios de Cambre, Carral, Culleredo e Oleiros, que forman unha contorna demográfica en plena expansión con case 135.000 habitantes.

Durante o acto, o presidente provincial, Valentín González Formoso, confirmou que en apenas dous meses este parque será o que conte con máis efectivos de toda a rede, chegando aos 25 axentes fronte aos 18 actuais grazas ao proceso de oposicións en marcha. O alcalde de Arteixo remarcou, á súa vez, a importancia da localización das novas instalacións.

OUTRAS INICIATIVAS

Noutra orde de cousas, a deputada de Industria e Emprego da Deputación A Coruña, Rosa Ana García, participou en Vimianzo, xunto coa alcaldesa e tamén deputada provincial, Mónica Rodríguez, na presentación da segunda edición do foro Alza Voz de Muller.

O encontro celebrarase os días 8 e 9 de maio e reunirá a profesionais de distintos ámbitos para compartir experiencias e coñecementos sobre o liderado feminino, especialmente en zonas rurais.

Mentres, o organismo provincial concedeu definitivamente o programa de subvencións promovido polo Servizo de Promoción e Desenvolvemento Turístico, que permitirá a un total de 54 municipios e entidades locais da provincia dispor de financiamento para cubrir os gastos de persoal das súas oficinas de turismo durante o presente exercicio económico.