O festival Atlantic Pride da Coruña expande a súa influencia cunha nova proposta artística: O Atlantic Drag! Con ela, o ‘Orgullo do Norte’ coruñés propón, a tarde-noite do luns 6 de xullo, unha divertida homenaxe ao talento drag local, á súa forza escénica e a toda a creatividade, a liberdade e a reivindicación humorística e festiva que a arte drag supón para a cidade.
As 13 raíñas do transformismo que encherán de orgullo o Atlantic Drag na Praza de Pontevedra serán: Agata Terrier, Ball Monte, Cloe Savage, Escarlatina Pier, Kara, Kelly Amethyst, Kit, Meri Krishna, Muna Duval, Nomi Bull, Rrrita, Xen e Yvhanne Klown, todas elas, recoñecidas caras de espazos de referencia da escena drag galega, como o Claro Boba! ou It’s Time for Drag.
Segundo apunta a organización do festival: “O Atlantic Drag! nace como a gran celebración do drag coruñés dentro de Atlantic Pride, unha proposta creada para recoñecer, visibilizar e poñer en valor o talento local que, desde hai anos, forma parte esencial da vida cultural, artística e nocturna da cidade. Máis ca un espectáculo, Atlantic Drag é unha homenaxe ás artistas que, a través da escena, da estética, da palabra, do humor, da música e da performance, converten o drag nunha poderosa expresión de liberdade, identidade e creatividade”.
Lembramos que o festival, organizado pola Asociación Orgullo Coruña –ORCO– e co patrocinio institucional do Concello da Coruña e o apoio da Deputación da Coruña desenvolverá a súa sétima edición do 5 ao 12 de xullo de 2026.
Poden consultar a programación na web do festival.
Máis novas
