A Deputación da Coruña organiza o próximo día 23 de abril unha xornada centrada nas novas violencias machistas dixitais, no marco da súa campaña ‘De Fronte’. Trátase dunha iniciativa orientada á prevención e á loita contra a violencia de xénero que terá lugar no Museo de Ciencia e Tecnoloxía (Muncyt), en horario de 09.30 a 19.00 horas. A participación require de inscrición previa, que é de carácter gratuíto.

Na presentación do evento, a deputada de Igualdade, Sol Agra, explicou que esta xornada forma parte dun proxecto que naceu ao redor da conmemoración do 25N, Día da Eliminación da Violencia contra as Mulleres. A actividade busca dotar de ferramentas para identificar e combater as agresións que se producen a través das novas tecnoloxías e as redes sociais.

Ademais, Sol Agra sinalou que esta acción responde á “preocupación” da área de Igualdade ante o avance dos discursos negacionistas e das correntes reaccionarias que pretenden disfrazar o machismo como unha elección ou un estilo de vida. Con esta xornada, a institución provincial reforza o seu compromiso coa igualdade e coa protección das mulleres fronte ás novas formas de acoso e violencia que xorden no ámbito dixital.