Este sábado 2 de maio arrinca (IN)VISUAL, o novo ciclo de música audiovisual impulsado pola Deputación da Coruña. As experiencias deste novidoso evento de arte e tecnoloxía en Galicia (un total de catro concertos LIVE AV), levaranse a cabo os sábados 2, 9, 16 e 23 de maio, en Coruña Estudio Inmersivo (CEI), o maior plató de produción virtual de España, situado na Cidade das TIC.
No programa deste novo ciclo de música audiovisual e prácticas dixitais contemporáneas danse cita destacadas figuras internacionais da creación de vangarda: MAOTIK, Marta Verde & José Venditti, Estela Oliva & Ana Quiroga e MIL111.
O concerto de MAOTIK deste sábado, 2 de maio, esgotou xa todas as súas entradas, mentres que os últimos tíckets dispoñibles para o resto de actuacións –gratuítos, cun depósito de 5 euros para a súa reserva, que serán reembolsados de xeito automático no momento do acceso– están dispoñibles en Ataquilla.
Xulio Vázquez destacou que “a potencia do proxecto reside, tamén, en vincular un espazo industrial descoñecido, a antiga fábrica de armas da Coruña, e o seu paradigma industrial, co paradigma de futuro e tecnolóxico que representan a Cidade das TIC e o CEI”
