Dous sucesos distintos mantiveron en alerta os servizos de emerxencia da Coruña durante a mañá desta xornada. O primeiro deles, un accidente de tráfico; o segundo, un lume nun inmoble do centro urbano. En total, tres persoas recibiron atención sanitaria, unha delas con necesidade de traslado hospitalario.
COLISIÓN FRONTAL NA AC-11
Pasadas as 11:00 horas, dous turismos colisionaron frontalmente na avenida de Alfonso Molina, a vía pola que discorre a estrada AC-11, á altura do núcleo de Santa Gema. O accidente, do que informaron fontes municipais ao 112, afectou á circulación na zona. Como consecuencia do sinistro, unha persoa resultou ferida leve e tivo que ser trasladada a un centro hospitalario para recibir atención médica.
INCENDIO NA RÚA PANADEIRAS
Aproximadamente dúas horas antes, arredor das 09.00 horas, os Bombeiros da Coruña acudiron a un edificio situado na rúa Panadeiras tras declararse un incendio no seu interior. Os efectivos desplazados ao lugar comunicaron ao 112 que o orixe do lume foi a combustión dunha manta térmica.
Como consecuencia do suceso, dúas persoas de idade avanzada precisaron ser atendidas polos servizos sanitarios no propio lugar dos feitos por inhalación de fume. Segundo a información trasladada dende o 112, en ningún dos dous casos foi necesario o traslado a un centro hospitalario.
